घर

ॐ 

घर  

सुसन मास्के

त्यो घर जहाँ 

मेरो मन रम्छ 

त्यो घर जहाँ 

मेरो मन बस्छ

जसको चार पर्खाल

मायाको अंगालो बन्छ

जसको न्यानो ओतमा

 हिउँद र वर्षा कट्छ 

त्यो घरले सहजेर राखिदिएको

संझनाहरुको तहखाना छ

जहाँ रुने मात्र होइन

मुस्कुराउने हजारौ कारण छ

छानेर बस्न मनपर्ने 

एउटा कुना छ 

जहाँ मलाई छुदै

ओहर दोहर गनेै

मेरो केशसित मनपरी

खेलवाड गर्ने 

अटेरी चुल्बुले हावा छ 

तर म उसलाई 

मनपराउछु भन्ने कुरा 

उसलाई थाहा छ 

साह्रै मन पर्ने 

त्यो घरको एउटा

मयूरपङ्खी झ्याल छ

जसको ओटबाट 

घामले चोठा कोठा

भुइँ र भित्ताभरी

सुनौलो धर्के  

चित्रकारी गर्छ 

भन्न झण्डै बिर्सिएको

त्यो घरको आँगनमा 

पहिलो झरिले भिजाएको

माटोको अनुभूति जन्य 

सुगन्ध छ

 सुख र दुःखको रहर लाग्दो

घाम र छाया छ 

अरु भनु ? त्यो घर 

जहाँ मेरो सुनौलो दिन

अनि चाँदी जस्तो रात छ

त्यो घर जहाँ मेरो मन बस्छ

त्यो घर जहाँ मेरो मन रम्छ